പത്തനംതിട്ട ജില്ല സ്കൂൾ കലോത്സവത്തിൽ തുടർച്ചയായ 20ാം തവണയും കിടങ്ങന്നൂർ എസ്.വി.ജി.വി എച്ച്.എസ്.എസ് ഓവറോൾ ചാമ്പ്യന്മാരായി
കോഴഞ്ചേരി: പത്തനംതിട്ട ജില്ല സ്കൂൾ കലോത്സവത്തിൽ തുടർച്ചയായ 20ാം തവണയും കിടങ്ങന്നൂർ എസ്.വി.ജി.വി എച്ച്.എസ്.എസ് ഓവറോൾ ചാമ്പ്യന്മാരായി. 496 പോയന്‍റുമായാണ് കിരീടം കരസ്ഥമാക്കിയത്. എതിരാളികൾ തൊട്ടടുത്തുപോലുമില്ലെന്നത് സ്കൂൾ തുടരുന്ന കലാമികവിന്റെ സവിശേഷതയാകുന്നു. വെണ്ണിക്കുളം സെന്റ് ബഹനാൻസ് രണ്ടാമതും പത്തനംതിട്ട കാതോലിക്കേറ്റ് മൂന്നാംസ്ഥാനവും നേടി.
ഉപജില്ലയിൽ 875 പോയന്റുമായി പത്തനംതിട്ടയാണ് ഒന്നാമത്. കഴിഞ്ഞവർഷത്തെ തനിയാവർത്തനമായി ഉപജില്ലകളുടെ സ്ഥാനം. തിരുവല്ല രണ്ടാമതും കോന്നി മൂന്നാമതുമെത്തി. അടൂർ, പന്തളം എന്നിവരാണ് തുടർ സ്ഥാനങ്ങളിൽ.
യു.പി വിഭാഗത്തിൽ പന്തളം എൻ.എസ്.എസ് ഇ.എം.യു.പി.എസ് ഒന്നാമതെത്തി. ഹൈസ്കൂളിലും ഹയർസെക്കൻഡറിയിലും കിടങ്ങന്നൂർ എസ്.വി.ജി.വിക്കാണ് ഒന്നാംസ്ഥാനം. സംസ്കൃതോത്സവത്തിൽ വള്ളംകുളം നാഷനൽ എച്ച്.എസ് ചാമ്പ്യന്മാരായി. അറബിക് കലോത്സവത്തിൽ യു.പിയിൽ പത്തനംതിട്ട സെന്റ് മേരീസും ഹൈസ്കൂളിൽ ഐരവൺ പി.എസ് വി.പി.എമ്മും ചാമ്പ്യന്മാരായി.
പല മത്സരങ്ങളും വൈകിയാണ് അവസാനിച്ചത്. സമാപനവും വൈകി. പലയിടത്തും തർക്കങ്ങളും പതിവുകാഴ്ചയായി. നാലുദിവസമായി 70ഓളം അപ്പീലും എത്തി. 160ഓളം മത്സരങ്ങളിലായി 6000ത്തോളം വിദ്യാർഥികളാണ് കലാമേളയിൽ മാറ്റുരച്ചത്.
pathanamthitta-district-school-kalolsavam
