നാരങ്ങാനത്ത് കാണാതായ വീട്ടമ്മയുടെ മൃതദേഹം കിണറ്റില്‍ കണ്ടെത്തി
പത്തനംതിട്ട : നാരങ്ങാനത്ത് കിണറിനുള്ളില്‍ വീട്ടമ്മയുടെ മൃതദേഹം കണ്ടെത്തി. നാരങ്ങാനം വെട്ടിമൂട്ടില്‍ വീട്ടില്‍ പ്രഭയുടെ ഭാര്യ ലത (56) യുടെ മൃതദേഹമാണ് കണ്ടെത്തിയത്. രാവിലെ ഏഴരയോടെ ഇവരെ കാണാതായതിനെ തുടര്‍ന്ന് വീട്ടുകാര്‍ ആറന്മുള പോലീസ് സ്റ്റേഷനില്‍ വിവരമറിയിക്കുകയായിരുന്നു. തുടര്‍ന്ന് പോലീസ് സ്ഥലത്തെത്തി നടത്തിയ പരിശോധനയില്‍ വീട്ടിലെ കിണറിന് സമീപത്ത് നിന്നും വീട്ടമ്മയുടെ ചെരുപ്പ് കണ്ടെത്തുകയും ചെയ്തു. സംശയം തോന്നിയ ആറന്മുള പോലീസ് പത്തനംതിട്ട ഫയര്‍ ഫോഴ്സില്‍ വിവരമറിയിക്കുകയും ചെയ്തു. തുടര്‍ന്ന് ഫയര്‍ ഫോഴ്സ് കിണറ്റിലിറങ്ങി നടത്തിയ തെരച്ചിലില്‍ വീട്ടമ്മയുടെ മൃതദേഹം കണ്ടെത്തുകയായിരുന്നു.
ആഴമുള്ള കിണറിന്റെ അടിത്തട്ടിലായിരുന്നു മൃതദേഹം കിടന്നിരുന്നത്. ഇതിനാല്‍ ഫയര്‍ ഫോഴ്സ് ഏറെ പ്രയാസപ്പെട്ടാണ് മൃതദേഹം കരയ്ക്ക് കയറ്റിയത്. സീനിയർ ഫയർ & റെസ്ക്യൂ ഓഫീസർ അനീഷ് ജി. യുടെ നേതൃത്വത്തിൽ ഫയര്‍ ഫോഴ്സ് ഉദ്യോഗസ്ഥരായ രഞ്ജിത് എ., ഷംജി കുമാർ, അജയകമാർ, ഡേവിഡ്, അസീം അലി എന്നിവരടങ്ങിയ സംഘമാണ് മൃതദേഹം പുറത്തെത്തിച്ചത്.
The body of a missing housewife in Naranganam was found in a well
