ശബരിമല സ്വര്ണ്ണക്കൊള്ള കേസില് ദ്വാരപാലക ശില്പപാളികള് ഇളക്കിമാറ്റിയിട്ട് ഒരു വര്ഷം; ഇതുവരെയും കുറ്റപത്രം സമര്പ്പിച്ചില്ല
പത്തനംതിട്ട : ശബരിമല സ്വര്ണ്ണക്കൊള്ള കേസില് ക്ഷേത്രത്തിലെ ദ്വാരപാലക ശില്പ പാളികള് വീണ്ടും സ്വര്ണ്ണം പൂശുവാന് ഇളക്കിയെടുത്തിട്ട് സെപ്റ്റംബര് 7 ന് ഒരു വര്ഷം തികയുമ്പോള് അന്വേഷണത്തില് കുറ്റപത്രം സമര്പ്പിക്കാന് ഇതുവരെയും കഴിഞ്ഞിട്ടില്ല. കഴിഞ്ഞ വര്ഷം സെപ്റ്റംബര് 7 ന് രാത്രിയിലാണ് പാളികള് അഴിച്ചെടുത്ത് ചെന്നൈയിലേക്ക് കൊണ്ടുപോയത്. 2019 ല് ദേവസ്വം ബോര്ഡിന്റെയും ഉദ്യോഗസ്ഥരുടെയും ഒത്താശയോടെ നടന്ന സ്വര്ണ്ണക്കൊള്ള ദേവസ്വം വിജിലന്സ് നടത്തിയ പ്രാഥമിക അന്വേഷണത്തില് തന്നെ വ്യക്തമായിരുന്നു. ഇതിനെ തുടര്ന്ന് വിശദമായ അന്വേഷണം നടത്തുന്നതിനായി കേരള ഹൈക്കോടതി പ്രത്യേക അന്വേഷണ സംഘത്തെ നിയോഗിക്കുകയും ചെയ്തു.
2025 ഒക്ടോബര് 10 ന് ആരംഭിച്ച എസ്.ഐ.റ്റി അന്വേഷണത്തില് 11 മാസങ്ങള് പിന്നിട്ടിട്ടും പ്രാഥമിക കുറ്റപത്രം പോലും സമര്പ്പിക്കാന് കഴിഞ്ഞില്ല. അന്വേഷണ സംഘം അറസ്റ്റ് ചെയ്ത പ്രതികള് എല്ലാവരും ജാമ്യത്തില് ഇറങ്ങുകയും ചെയ്തു. ഹൈക്കോടതി നിയോഗിച്ച ദേവസ്വം സ്പെഷ്യല് കമ്മീഷണറെ അറിയിക്കാതെ വിലപിടിപ്പുള്ള വസ്തുക്കള് സന്നിധാനത്തിന് പുറത്തേക്ക് കൊണ്ടുപോകരുത് എന്ന ചട്ടം മറികടന്നാണ് സ്വര്ണ്ണപ്പാളികള് ചെന്നെയിലേക്ക് മാറ്റിയത്. 2019 ല് സ്വര്ണ്ണം പൂശി നല്കിയ സ്പോണ്സറായ ഉണ്ണികൃഷ്ണന് പോറ്റി താന് നല്കിയ ദ്വാരപാലക ശില്പ്പത്തിന്റെ താങ്ങുപീഠം കാണാതായി എന്ന് നടത്തിയ പ്രസ്താവനയാണ് കേസില് വഴിത്തിരിവായത്. താങ്ങുപീഠം കാണാതായ സംഭവം അന്വേഷിക്കാന് ഹൈക്കോടതി വിജിലന്സിനോട് നിര്ദ്ദേശിച്ചിരുന്നു.
One year since the detachment of the Dvarapala (gatekeeper) sculpted panels in the Sabarimala gold robbery case; chargesheet not filed yet
