പത്തനംതിട്ട : നിർമ്മാണം പൂർത്തിയായിട്ടും സാങ്കേതിക തടസ്സങ്ങളാൽ കെട്ടിട നമ്പർ ലഭിക്കാത്ത പത്തനംതിട്ട കെ.എസ്.ആർ.ടി.സി. ബസ് ടെർമിനലിന്റെ പ്രശ്നം അടിയന്തിരമായി പരിഹരിക്കുമെന്ന് ഗതാഗത മന്ത്രി സി.പി.ജോൺ നിയമസഭയിൽ അറിയിച്ചു. നിയമസഭയിലെ ചോദ്യോത്തര വേളയിൽ അബിൻ വർക്കി എം.എൽ.എ. ഉന്നയിച്ച ചോദ്യത്തിന് മറുപടി നൽകുകയായിരുന്നു അദ്ദേഹം. ശബരിമല തീർത്ഥാടനവുമായി ബന്ധപ്പെട്ട ഏറ്റവും പ്രധാനപ്പെട്ട ബസ് സ്റ്റേഷനുകളിലൊന്നായ പത്തനംതിട്ടയിലെ ടെർമിനൽ നിര്‍മ്മാണം പൂർത്തിയായിട്ട് ഒട്ടേറെ നാളുകളായെങ്കിലും എസ്.ടി.പി., ഫയർ എൻ.ഒ.സി. തുടങ്ങിയ വിഷയങ്ങളാൽ ഇതുവരെ കെട്ടിട നമ്പർ ലഭിച്ചിട്ടില്ലെന്ന് അബിൻ വർക്കി എം.എൽ.എ. ചൂണ്ടിക്കാട്ടി.
വരുന്ന ശബരിമല തീർത്ഥാടന കാലത്തിന് മുൻപായി ഈ പ്രശ്നം പരിഹരിക്കാൻ അടിയന്തിര നടപടികൾ സ്വീകരിക്കണമെന്നും എം.എൽ.എ. സഭയില്‍ ആവശ്യപ്പെട്ടു. എം.എൽ.എ.മാർ ചെയർമാന്മാരും തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധികൾ അംഗങ്ങളുമായ ട്രാന്‍സ്പോര്‍ട്ട്‌ മാനേജ്മെന്റ് കമ്മറ്റികൾ ഡിപ്പോകളുടെ പ്രവർത്തനം മെച്ചപ്പെടുത്താൻ ഫലപ്രദമായി ഇടപെടുന്നുണ്ടെന്ന് മന്ത്രി അറിയിച്ചു.
PATHANAMTHITTA
