മാലിന്യം ചീഞ്ഞ രൂക്ഷഗന്ധവും തെരുവുനായ ശല്യവും കാരണം വഴിയാത്രക്കാർക്ക് ബുദ്ധിമുട്ട്
ഏഴംകുളം : മാലിന്യം ചീഞ്ഞ രൂക്ഷഗന്ധവും തെരുവുനായ ശല്യവും കാരണം വഴിയാത്രക്കാർക്ക് ബുദ്ധിമുട്ട്. പറക്കോട് അമൃത ബോയ്സ് എച്ച്.എസിന്റെ പിൻഭാഗത്തുകൂടെ ഏഴംകുളത്തേക്ക് പോകുന്ന മുണ്ടയ്ക്കൽപ്പടി റോഡിലാണ് പ്രശ്നം.
ഇവിടെ അടൂർ നഗരസഭ സ്ഥാപിച്ച മിനി എം.സി.എഫിന് ചുറ്റും വ്യാപകമായി മാലിന്യംതള്ളുകയാണ്. ഭക്ഷണാവശിഷ്ടങ്ങൾ ഉൾപ്പെടെയുള്ളവ ഇവിടെക്കിടന്ന് ചീഞ്ഞ് ദുർഗന്ധം വമിക്കുകയാണ്. ഭക്ഷണാവശിഷ്ടങ്ങൾ കഴിക്കാൻ നായ്ക്കൾ ഇവിടെ കൂട്ടമായി തമ്പടിച്ചിരിക്കുകയാണ്. ദിവസവും സ്കൂൾ വിദ്യാർഥികൾ ഉൾപ്പെടെ നടന്നുപോകുന്ന വഴിയാണ്.
രാത്രിയിൽ നായ്ക്കൾ കാരണം ധൈര്യപൂർവം ഇതുവഴി നടന്നുപോകാൻ സാധിക്കുന്നില്ലെന്ന് പ്രദേശത്തുള്ളവർ പറയുന്നു. രാത്രിസമയത്ത് ഇരുചക്രവാഹനങ്ങളിൽ പോകുന്നവർക്കും നായ്ക്കൾ ശല്യമുണ്ടാക്കുന്നുണ്ടെന്ന് പറയുന്നു. മാലിന്യം നിക്ഷേപിക്കുന്നത് കർശനമായി നിരോധിച്ചിട്ടുണ്ടെന്ന് നഗരസഭാ സെക്രട്ടറി വ്യക്തമാക്കുന്ന ബോർഡ് മിനി എം.സി.എഫിൽ സ്ഥാപിച്ചിട്ടുണ്ട്.
പക്ഷേ, ഇതൊന്നും വകവെയ്ക്കാതെയാണ് മാലിന്യനിക്ഷേപം. അധികം വീടുകളും വെളിച്ചവും ഇല്ലാത്തതാണ് മാലിന്യം തള്ളുന്നവർക്ക് സൗകര്യമായ. മാലിന്യനിക്ഷേപം തടയാൻ ബന്ധപ്പെട്ടവർ നടപടി സ്വീകരിക്കണമെന്നതാണ് നാട്ടുകാരുടെ ആവശ്യം.
waste
