നൂറുകണക്കിന് ജനങ്ങളുടെ ജലസ്രോതസ്സായിരുന്ന കോഴഞ്ചേരി പൊങ്ങനാലിൽ തോട് ഇന്ന് മാലിന്യവാഹിനി
കോഴഞ്ചേരി :നൂറുകണക്കിന് ജനങ്ങളുടെ ജലസ്രോതസ്സായിരുന്ന കോഴഞ്ചേരി പൊങ്ങനാലിൽ തോട് ഇന്ന് മാലിന്യവാഹിനിയായി മാറി. കോളേജ് ജങ്ഷനിലെ വൺവേ റോഡിൽ പൊങ്ങനാലിൽ ഭാഗത്തുനിന്ന് ആരംഭിച്ച് കീഴുകര പമ്പാനദിയിൽ അവസാനിക്കുന്ന തോട്ടിൽ ഹോട്ടലിലെയും അറുവുശാലയുടെയും വീടുകളിലെയും മലിന്യങ്ങളാണ് തോട്ടിൽ നിറഞ്ഞിരിക്കുന്നത്.
കോഴഞ്ചേരി ഗ്രാമപ്പഞ്ചാത്തിലെ താഴ്ന്ന, ഉയർന്ന പ്രദേശങ്ങളിലേക്ക് വെള്ളം എത്തിക്കുന്ന കീഴുകര പമ്പ് ഹൗസിന് 100 മീറ്ററോളം മുകളിലാണ് ഈ മാലിന്യം എല്ലാം എത്തിച്ചേരുന്നത്. ഈ തോട് ജനങ്ങൾ മൂന്ന് പതിറ്റാണ്ടോളം കുളിക്കാനായി ഉപയോഗിച്ചിരുന്നെങ്കിലും ഒരു പതിറ്റാണ്ടിലേറെയായി ദുർഗന്ധം വമിക്കുന്നതുമൂലം സമീപവാസികൾ തോട്ടിലെ ജലം ഉപേക്ഷിച്ച അവസ്ഥയിലാണ്.
തോട്ടിൽ നീരൊഴുക്ക് നിലനിൽക്കുന്നുണ്ടെങ്കിലും തീരത്ത് നിൽക്കുന്ന വൃക്ഷങ്ങളുടെ ഇലകൾ വെള്ളത്തിൽ വീണ് കിടക്കുന്നതും സമീപത്തെ കാട് തോട് മൂടി കിടക്കുന്നതുംമൂലം നീരൊഴുക്ക് നഷ്ടപ്പെട്ട് മാലിന്യങ്ങൾ പല സ്ഥലത്തും കെട്ടിക്കിടക്കുന്നത് സമീപവാസികൾക്ക് ഏറെ ബുദ്ധിമുട്ടുണ്ടാക്കുന്നു.ഇത്തരത്തിൽ ഒഴുക്ക് നഷ്ടപ്പെട്ട അവസ്ഥയിൽ മഴ കനക്കുമ്പോൾ ഈ മാലിന്യങ്ങൾ ഏറെ ദൂരമാണ് ഒഴുകി പടരുന്നതും പകർച്ച വ്യാധികൾക്ക് കാരണമാകുന്നതും.
50 ഏക്കറോളം വിസ്തൃതിയുള്ള മുളങ്ങോടി പാടശേഖരത്തിൽകൂടിയാണ് ഈ തോട് കടന്നുപോകുന്നത്. 2004 വരെ തോട്ടിലെ വെള്ളം ഉപയോഗിച്ചായിരുന്നു ഇവിടെ കൃഷി ഇറക്കിയിരുന്നത്. എന്നാൽ, ജലത്തിൽ മാലിന്യ അളവ് കൂടിയതോടെ പാടശേഖരവും തരിശായി മാറി.
ponganal thod;kozhencherry
