വളവ് തിരിയുന്നതിനിടെ നിയന്ത്രണം തെറ്റിയ ടിപ്പർ കടയുടെ മുമ്പിലേക്ക് ഇടിച്ചുകയറി.
സീതത്തോട് : വളവ് തിരിയുന്നതിനിടെ നിയന്ത്രണം തെറ്റിയ ടിപ്പർ കടയുടെ മുമ്പിലേക്ക് ഇടിച്ചുകയറി. സംഭവസമയം സ്ഥലത്ത് ആളോ വാഹനങ്ങളോ ഇല്ലാതിരുന്നതിനാൽ വൻ ദുരന്തം ഒഴിവായി. ചിറ്റാർ പഴയ ബസ്സ്റ്റാൻഡിലാണ് കഴിഞ്ഞ ദിവസം വൈകുന്നേരം അഞ്ച് മണിയോടെ അപകടമുണ്ടായത്. ചിറ്റാർ-കൂരാമ്പാറയിലുള്ള സ്വകാര്യ ക്രഷർ യൂണിറ്റിൽ പാറ ഉത്പന്നം കയറ്റാനെത്തിയ വണ്ടിയാണ് അപകടത്തിൽപ്പെട്ടത്.ചിറ്റാറിൽ ക്രഷർ യൂണിറ്റിൽനിന്ന് പാറ ഉത്പന്നങ്ങളുമായി പോകുന്ന ടോറസ് ലോറികൾ വ്യാപക അപകടമുണ്ടാക്കുന്നതായി ഏറെ നാളായി പരാതി നിലനിൽക്കുകയാണ്. നൂറുകണക്കിന് ലോറികളാണ് വളവും തിരിവും നിറഞ്ഞ ചിറ്റാർ-വടശേരിക്കര പാതയിലൂടെ അമിതവേഗത്തിൽ ഓടി അപകടങ്ങൾ പതിവാക്കുന്നത്. ഇവിടെ സ്കൂൾ സമയങ്ങളിൽപോലും യാതൊരു നിയന്ത്രണവുമില്ലാതെയാണ് ടിപ്പർ ലോറികൾ ഓടുന്നത്.
ടിപ്പർ ലോറികളുടെ അമിത വേഗത്തിലുള്ള ഓട്ടവും അപകടങ്ങളും വ്യാപക പരാതിക്കിടയാക്കിയിട്ടും പോലീസും മോട്ടോർ വാഹന വകുപ്പും യാതൊരു നടപടിയും സ്വീകരിക്കുന്നില്ലെന്നും ആക്ഷേപമുണ്ട്. അമിതഭാരം കയറ്റിപ്പോകുന്ന കൂറ്റൻ ലോറികളിൽ പലതും മതിയായ കണ്ടീഷനുള്ള വാഹനങ്ങളല്ലെന്നും ചൂണ്ടിക്കാണിക്കപ്പെടുന്നു. ചിറ്റാർ-വടശേരിക്കര പാതയിൽ സുഗമമായ വാഹനയാത്രയ്ക്ക് ടിപ്പർ ലോറികൾ വൻ ഭീഷണിയായി മാറിയിരിക്കുകയാണ്.
seethathod
