കാട്ടുപന്നി സ്കൂട്ടറിന് മുന്നിലേക്ക് ചാടിയതിനെത്തുടർന്ന് യുവതിക്ക് പരിക്ക്
പത്തനംതിട്ട : അരുവാപ്പുലം പഞ്ചായത്തിന് സമീപം കാട്ടുപന്നി സ്കൂട്ടറിന് മുന്നിലേക്ക് ചാടിയതിനെത്തുടർന്ന് യുവതിക്ക് പരിക്ക്. കല്ലേലി സ്വദേശിനിയായ നിഷ ഹമീദിനാണ് അപകടത്തിൽ പരിക്കേറ്റത്. ഇന്ന് രാവിലെ ആറരയോടെ പത്രവിതരണം നടത്തുന്നതിനിടെയാണ് അപകടം ഉണ്ടായത്. തന്റെ സ്കൂട്ടറിൽ പത്രവിതരണത്തിനായി പോവുകയായിരുന്നു നിഷ. ഈ സമയത്താണ് അപ്രതീക്ഷിതമായി കാട്ടുപന്നി വാഹനത്തിന് മുന്നിലേക്ക് കുറുകെ ചാടിയത്. പന്നി വരുന്നത് കണ്ട് പെട്ടെന്ന് ബ്രേക്ക് പിടിച്ചതോടെ സ്കൂട്ടറിന്റെ നിയന്ത്രണം നഷ്ടമാവുകയും സമീപത്തുള്ള ഒരു വേലിയിലേക്ക് ഇടിച്ചു കയറി മറിഞ്ഞു വീഴുകയുമായിരുന്നു. അപകടത്തിൽ നിഷയുടെ മുഖത്തും കാലിനുമാണ് പരിക്കേറ്റത്. ഉടൻ തന്നെ ഇവരെ ആശുപത്രിയിൽ പ്രവേശിപ്പിച്ചു. നിലവിൽ നിഷയ്ക്ക് ഗുരുതരമായ ആരോഗ്യപ്രശ്നങ്ങൾ ഇല്ലെന്ന് ആശുപത്രി അധികൃതർ അറിയിച്ചു. പത്തനംതിട്ട ജില്ലയുടെ മലയോര മേഖലയായ കല്ലേലി, അരുവാപ്പുലം ഭാഗങ്ങളിൽ വന്യമൃഗശല്യം രൂക്ഷമാണെന്ന് നാട്ടുകാർ പറയുന്നു.
wild-boar-collision-injures
