പന്തളം കൈപ്പുഴ കൊട്ടാരത്തിൽ മോഷണശ്രമം നടത്തിയ പശ്ചിമ ബംഗാൾ സ്വദേശിയെ പോലീസ് പിടികൂടി
പത്തനംതിട്ട : പന്തളം കൈപ്പുഴ കൊട്ടാരത്തിൽ മോഷണശ്രമം നടത്തിയ പശ്ചിമ ബംഗാൾ സ്വദേശിയെ പോലീസ് പിടികൂടി. പന്തളം കൈപ്പുഴ പുത്തൻകോയ്ക്കൽ കൊട്ടാരത്തിൽ ദീപാവർമ്മയുടെ വീട്ടിലായിരുന്നു കഴിഞ്ഞ ദിവസം രാത്രി പത്ത് മണിയോടെ മോഷണശ്രമം നടന്നത്. പശ്ചിമ ബംഗാൾ സ്വദേശിയായ 46 വയസ്സുകാരൻ സുധാകർ ആണ് പോലീസിന്റെ പിടിയിലായത്. ഇയാൾ സംഭവ സമയത്ത് മദ്യപിച്ചിരുന്നതായി പോലീസ് അറിയിച്ചു. രാത്രി പത്ത് മണിയോടെ കൊട്ടാരത്തിന്റെ പരിസരത്തെത്തിയ മോഷ്ടാവ് മതിൽ ചാടിക്കടക്കുന്നതും വാതിൽ തുറക്കാൻ ശ്രമിക്കുന്നതും സിസിടിവി ദൃശ്യങ്ങളിൽ പതിഞ്ഞിട്ടുണ്ട്. വാതിൽ തുറക്കാൻ ശ്രമിക്കുന്ന ശബ്ദം കേട്ട് ഉടമ ദീപാവർമ്മ ബഹളം വെക്കുകയും തുടർന്ന് ഓടിയെത്തിയ ബന്ധു ദിലീപ് മോഷ്ടാവിനെ പിടികൂടുകയുമായിരുന്നു. വിവരം അറിയിച്ചതിനെ തുടർന്ന് പന്തളം പോലീസ് സ്ഥലത്തെത്തി മോഷ്ടാവിനെ കസ്റ്റഡിയിലെടുത്തു.
attempted-theft-at-pandalam-kaipuzha-palace-west-bengal-native-arrested
