ആൽമരത്തിന്റെ കൊമ്പുകൾ എം.ടി.എൽ.പി. സ്കൂളിലെ വിദ്യാർഥികൾക്കും യാത്രക്കാർക്കും ഭീഷണിയാകുന്നു
കടപ്ര : ആൽമരത്തിന്റെ കൊമ്പുകൾ എം.ടി.എൽ.പി. സ്കൂളിലെ വിദ്യാർഥികൾക്കും യാത്രക്കാർക്കും ഭീഷണിയാകുന്നു. സ്കൂളിന് എതിർവശം പുറമ്പോക്കിലുള്ള ആലിന്റെ കൊമ്പുകൾ സ്കൂൾ വളപ്പിലേക്ക് വളർന്ന് പന്തലിച്ചുനിൽക്കുകയാണ്.
പതിറ്റാണ്ടുകളുടെ പഴക്കമുണ്ട് ആൽമരത്തിന്. രണ്ട് വലിയ കൊമ്പുകൾ പടർന്ന് സ്കൂൾ മുറ്റം വരെയെത്തി. സ്കൂൾ പരിസരത്തുള്ള വാകമരത്തിൽ തട്ടിയാണ് ഇപ്പോൾ ആൽമരത്തിന്റെ കൊമ്പുകളുള്ളത്.
പാറപ്പുറത്താണ് ആൽമരം നിൽക്കുന്നത്. സമീപപ്രദേശത്തുള്ള റബ്ബർ മരങ്ങൾ വെട്ടിയതിനാൽ മഴയും കാറ്റും ഉള്ളപ്പോൾ ആൽമരം ശക്തിയായി ഉലയുന്നുണ്ടെന്ന് പ്രദേശവാസികൾ പറയുന്നു.
ആൽ മരത്തിന്റെ സമീപം നാല് വീടുകളുണ്ട്. സ്കൂൾ കെട്ടിടത്തിനും ആൽമരത്തിനും ഇടയിലാണ് റോഡ്. ഇതിലൂടെയാണ് നിരവധി വാഹനങ്ങളും കാൽനടക്കാരും വിദ്യാർഥികളും കടന്നുപോകുന്നത്. കാറ്റൊന്ന് ആഞ്ഞ് വീശിയാൽ കൊമ്പ് നിലംപതിക്കും. അടിയന്തരമായി ആൽമരത്തിന്റെ കൊമ്പുകൾ മുറിച്ചുമാറ്റണമെന്ന് രക്ഷിതാക്കളും അധ്യാപകരും ആവശ്യപ്പെടുന്നു.
kadapra
