ലോക യുവജന നൈപുണ്യ ദിനത്തോടനുബന്ധിച്ച് അസാപ് കേരളയുടെ നേതൃത്വത്തിൽ ഇലക്ട്രിക് വാഹന സർവീസിങ്ങിൽ ഏകദിന ശില്പശാലയും പ്രദർശനവും സംഘടിപ്പിച്ചു. കുന്നന്താനം കമ്മ്യൂണിറ്റി സ്കിൽ പാർക്കിൽ നടന്ന പരിപാടി മല്ലപ്പള്ളി ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ് ഉദ്ഘാടനം ചെയ്തു. ഇലക്ട്രിക് വാഹന മേഖലയിലെ ഭാവി തൊഴിൽസാധ്യതകൾ യുവജനങ്ങൾക്ക് പരിചയപ്പെടുത്തുകയാണ് ശില്പശാലയുടെ ലക്ഷ്യം..
ഭാവിയിലെ തൊഴിൽ മേഖലയായി മാറിക്കൊണ്ടിരിക്കുന്ന ഇലക്ട്രിക് വാഹന രംഗത്തേക്ക് യുവജനങ്ങളെ ആകർഷിക്കുക എന്ന ലക്ഷ്യത്തോടെയാണ് ലോക യുവജന നൈപുണ്യ ദിനത്തിൽ അസാപ് കേരള വേറിട്ടൊരു ശില്പശാല സംഘടിപ്പിച്ചത്. കേരള സർക്കാർ ഉന്നത വിദ്യാഭ്യാസ വകുപ്പിന് കീഴിലുള്ള അസാപ് കേരളയുടെ കുന്നന്താനം കമ്മ്യൂണിറ്റി സ്കിൽ പാർക്കിൽ, വെണ്ണിക്കുളം ഗവൺമെന്റ് പോളിടെക്നിക് കോളേജിന്റെ സഹകരണത്തോടെയായിരുന്നു പരിപാടി. മല്ലപ്പള്ളി ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ് പരിപാടിയുടെ ഉദ്ഘാടനം നിർവഹിച്ചു. കുന്നന്താനം ഗ്രാമപഞ്ചായത്ത് പ്രസിഡന്റ് എം. ജെ. വിജയൻ ചടങ്ങിൽ അധ്യക്ഷത വഹിച്ചു.
ഇലക്ട്രിക് വാഹന മേഖലയിലെ സാങ്കേതിക മുന്നേറ്റങ്ങളെക്കുറിച്ചും വരാനിരിക്കുന്ന വലിയ തൊഴിൽസാധ്യതകളെക്കുറിച്ചും കുന്നന്താനം കമ്മ്യൂണിറ്റി സ്കിൽ പാർക്ക് മാനേജർ പ്രജിത്ത് കെ. കെ. വിദ്യാർത്ഥികളുമായി സംവദിച്ചു. യുവജനങ്ങൾ നൈപുണ്യ പരിശീലനങ്ങളിലൂടെ ഈ മേഖലയിലേക്ക് കൂടുതൽ കടന്നുവരേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു. തുടർന്ന് അസാപ് കമ്മ്യൂണിറ്റി സ്കിൽ പാർക്കിലെ ഇലക്ട്രിക് വാഹന വിഭാഗം അധ്യാപകൻ താജുദ്ധീൻ അലിഖാന്റെ നേതൃത്വത്തിൽ പരിശീലനം നേടിയ വിദ്യാർത്ഥികൾ ഇലക്ട്രിക് വാഹന സർവീസിങ് ലാബിന്റെ പ്രവർത്തനങ്ങളെക്കുറിച്ച് വിശദീകരിച്ചു.
വാഹന ഘടകങ്ങൾ, ബാറ്ററി സാങ്കേതികവിദ്യ, അവയുടെ പരിപാലന രീതികൾ എന്നിവയെക്കുറിച്ചുള്ള വിശദമായ പ്രദർശനവും ശില്പശാലയുടെ ഭാഗമായി നടന്നു.മല്ലപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്റ് എബി മേക്കരിങ്ങാട്ട്, കുന്നന്താനം ഗ്രാമപഞ്ചായത്ത് അംഗം വർഗീസ് മാത്യു, വെണ്ണിക്കുളം ഗവൺമെന്റ് പോളിടെക്നിക് കോളേജിലെ ഓട്ടോമൊബൈൽ വിഭാഗം അധ്യാപകൻ റോണിമോൻ സണ്ണി എന്നിവർ ചടങ്ങിൽ ആശംസകൾ അറിയിച്ചു. ജൂനിയർ എക്സിക്യൂട്ടീവ് ശ്രീലക്ഷ്മി എസ് നായർ ചടങ്ങിന് നന്ദി രേഖപ്പെടുത്തി. ഇലക്ട്രിക് വാഹന മേഖലയിലെ സാങ്കേതിക നവീകരണങ്ങളെക്കുറിച്ച് വിദ്യാർത്ഥികളിൽ വലിയ അവബോധം സൃഷ്ടിക്കാൻ ഈ ഏകദിന ശില്പശാലയ്ക്ക് സാധിച്ചു.
Thiruvalla
