കോന്നിയിൽ പഞ്ചായത്ത് കമ്യൂണിറ്റി ഹാളിലെ ഫാൻ വീണ് യുവതി ബോധരഹിതയായി; മുഖത്ത് പരിക്ക്
കോന്നി ∙ പഞ്ചായത്ത് കമ്യൂണിറ്റി ഹാളിലെ ഫാൻ ഇളകി വീണു യുവതിയുടെ മുഖത്തു പരിക്ക്. അട്ടച്ചാക്കൽ ആഞ്ഞിലികുന്ന് ദേവീ കൃപ സാബു ബി.കൃഷ്ണയുടെ ഭാര്യ ഒ.സന്ധ്യയ്ക്കാണു (38) പരുക്കേറ്റത്. ഇന്നലെ ഉച്ചയ്ക്ക് ഒരുമണിയോടെയാണു സംഭവം. ഭർത്താവിന്റെ വർക്ഷോപ്പിന്റെ ലൈസൻസുമായി ബന്ധപ്പെട്ട ആവശ്യത്തിനാണു സന്ധ്യ പഞ്ചായത്ത് ഓഫിസിൽ എത്തുന്നത്. സെക്രട്ടറിയുടെ പ്രസിഡന്റും കമ്യൂണിറ്റി ഹാളിൽ മീറ്റിങ്ങിലായതിനാൽ കാത്തിരിക്കേണ്ടി വന്നു. കമ്യൂണിറ്റി ഹാളിൽ പിൻഭാഗത്തായി ഇരുന്ന സന്ധ്യയുടെ മുകളിലേക്കു പ്രവർത്തിച്ചുകൊണ്ടിരുന്ന ഫാൻ ഇളകി വീഴുകയായിരുന്നു.
ഫാൻ ലീഫ് കറങ്ങി വന്നു മുഖത്തു പതിച്ചാണു മുറിവേറ്റത്. ബോധരഹിതയായി വീണ സന്ധ്യയെ പഞ്ചായത്ത് അധികൃതർ താലൂക്ക് ആശുപത്രിയിൽ കൊണ്ടുപോയി ശുശ്രൂഷ നൽകി വീട്ടിലെത്തിച്ചു. മുഖത്തു 3 കുത്തിക്കെട്ട് ആവശ്യമായി വന്നു. കമ്യൂണിറ്റി ഹാളിന്റെ ഭിത്തിയോടു ചേർന്നുള്ള ഫാനിന്റെ ലോക് പിൻ ഊരിയാണ് ഫാൻ വീണതെന്നും സന്ധ്യയ്ക്ക് ചികിത്സയ്ക്കുള്ള ക്രമീകരണം ചെയ്തെന്നും അറ്റകുറ്റപ്പണി ആവശ്യമായ പഴയ കെട്ടിടമാണിതെന്നും പഞ്ചായത്ത് പ്രസിഡന്റ് റോജി ഏബ്രഹാം പറഞ്ഞു.
Woman faints after ceiling fan falls on her at Konni Panchayat Community Hall; suffers facial injuries
