കോഴഞ്ചേരി: കോഴഞ്ചേരിയിൽ നിർത്തിയിട്ടിരുന്ന കാറിന്റെ ഡോർ പെട്ടെന്ന് തുറന്നതിനെ തുടർന്നുണ്ടായ അപകടത്തിൽ സ്കൂട്ടർ യാത്രികന് ദാരുണാന്ത്യം. പുന്നക്കാട് സ്വദേശി എബ്രഹാം (57) ആണ് മരണപ്പെട്ടത്. റോഡിലേക്ക് തെറിച്ചുവീണ എബ്രഹാമിന്റെ ശരീരത്തിലൂടെ തൊട്ടുപിന്നാലെ വന്ന കെ.എസ്.ആർ.ടി.സി ബസ് കയറിയിറങ്ങുകയായിരുന്നു. കോഴഞ്ചേരി കണ്ണാശുപത്രിക്ക് മുന്നിൽ വെച്ചായിരുന്നു നാടിനെ നടുക്കിയ അപകടം സംഭവിച്ചത്.
എബ്രഹാം സ്കൂട്ടറിൽ സഞ്ചരിക്കുമ്പോൾ റോഡരികിൽ പാർക്ക് ചെയ്തിരുന്ന കാറിലുണ്ടായിരുന്നവർ പെട്ടെന്ന് ഡോർ തുറക്കുകയായിരുന്നു. ഡോർ സ്കൂട്ടറിൽ തട്ടിയതോടെ നിയന്ത്രണം നഷ്ടപ്പെട്ട എബ്രഹാം റോഡിന്റെ നടുവിലേക്ക് തെറിച്ചുവീണു.ഈ സമയം ഇതേ റോഡിലൂടെ കടന്നുപോയ കെ.എസ്.ആർ.ടി.സി ബസ് എബ്രഹാമിന്റെ ശരീരത്തിലൂടെ കയറിയിറങ്ങുകയായിരുന്നു. അപകടം നടന്നയുടൻ തന്നെ ഇദ്ദേഹം മരണപ്പെട്ടു.സംഭവത്തെ തുടർന്ന് ആറന്മുള പോലീസ് സ്ഥലത്തെത്തി നിയമനടപടികൾ സ്വീകരിച്ചു.
ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്ക് വിട്ടുനൽകും. റോഡരികിൽ വാഹനങ്ങൾ നിർത്തിയിടുമ്പോൾ അശ്രദ്ധമായി ഡോർ തുറക്കുന്നത് ഉണ്ടാക്കുന്ന വലിയ അപകടങ്ങളിലേക്കാണ് ഈ സംഭവം വിരൽ ചൂണ്ടുന്നത്.
Scooter accident
