ഒരു മാസം മുൻപ് കാണാതായ കോന്നി കാട്ടാത്തി ഉന്നതിയിലെ ഊര് മൂപ്പൻ മോഹൻദാസിന്റെ മൃതദേഹം കണ്ടെത്തി
പത്തനംതിട്ട : കോന്നിയിൽ ഒരു മാസമായി കാണാതിരുന്ന ഊര് മൂപ്പനെ ഉൾക്കാട്ടിൽ മരിച്ച നിലയിൽ കണ്ടെത്തി. കൊക്കാത്തോട് കാട്ടാത്തി ഉന്നതി ആദിവാസി ഊരിലെ മൂപ്പൻ മോഹൻദാസിൻ്റെ മൃതദേഹമാണ് കണ്ടെത്തിയത്. ദിവസങ്ങളായി പോലീസും വനംവകുപ്പും പ്രത്യേക സംഘവും നടത്തിയ ആഴത്തിലുള്ള തിരച്ചിലിനൊടുവിലാണ് പൂർണ്ണമായും ജീർണ്ണിച്ച നിലയിൽ മൃതദേഹം കണ്ടെത്തിയത്.
കഴിഞ്ഞ ജൂൺ 27-നാണ് 70-കാരനായ ഊര് മൂപ്പൻ മോഹൻദാസിനെ കോന്നിയിലെ വനത്തിനുള്ളിൽ വെച്ച് കാണാതാകുന്നത്. പഴയൊരു കേസുമായി ബന്ധപ്പെട്ട് കോടതിയിൽ നിന്ന് സമൻസ് ലഭിച്ചതിന് പിന്നാലെ അദ്ദേഹം മനോവിഷമത്തിൽ കാടുകയറുകയായിരുന്നു എന്ന് ബന്ധുക്കൾ പറയുന്നു
ആദ്യഘട്ടത്തിൽ കരിപ്പാൻതോട് സ്റ്റേഷനിലെ വനപാലകരും കോന്നി പോലീസും തിരച്ചിൽ നടത്തിയെങ്കിലും മൂപ്പനെ കണ്ടെത്താനായിരുന്നില്ല. പോലീസിനെതിരെ ഗുരുതരമായ കൈക്കൂലി ആരോപണങ്ങളുമായി കുടുംബം രംഗത്തെത്തിയതോടെ അന്വേഷണം വലിയ വിവാദങ്ങൾക്ക് വഴിവെച്ചു. ഒരു കേസ് ഒത്തുതീർപ്പാക്കാൻ കൈക്കൂലി വാങ്ങിയിട്ടും മൂപ്പനെ പോലീസ് വീണ്ടും കേസിൽ കുടുക്കുകയായിരുന്നു എന്നാണ് കുടുംബത്തിൻ്റെ ആരോപണം.
തിരോധാനത്തിൽ ദുരൂഹത ആരോപിച്ച് കുടുംബം കളക്ടർക്കും എസ്പിക്കും പരാതി നൽകിയതിനെ തുടർന്ന് കഴിഞ്ഞ ദിവസങ്ങളിൽ അന്വേഷണത്തിനായി പ്രത്യേക സംഘത്തെ (SIT) നിയോഗിച്ചിരുന്നു. വനംവകുപ്പും പോലീസും ബന്ധുക്കളും ചേർന്ന് ഉൾവനത്തിൽ നടത്തിയ വിപുലമായ ഡീപ്പ് സെർച്ചിനൊടുവിലാണ് ഇന്ന് മൃതദേഹം കണ്ടെത്താനായത്. മൃതദേഹം ഇൻക്വസ്റ്റ് നടപടികൾ പൂർത്തിയാക്കി പോസ്റ്റ്മോർട്ടത്തിനായി മാറ്റും. മരണത്തിൽ മറ്റെന്തെങ്കിലും ദുരൂഹതയുണ്ടോ എന്ന് പോലീസ് അന്വേഷിച്ചുവരികയാണ്
കോന്നി പോലീസിനെതിരെ വലിയ ആക്ഷേപങ്ങൾ നിലനിൽക്കുന്ന സാഹചര്യത്തിൽ, ഊര് മൂപ്പൻ്റെ മരണം വരും ദിവസങ്ങളിൽ കൂടുതൽ രാഷ്ട്രീയ-സാമൂഹിക ചർച്ചകൾക്ക് കാരണമായേക്കും. പോസ്റ്റ്മോർട്ടം റിപ്പോർട്ട് പുറത്തുവരുന്നതോടെ മരണകാരണത്തിൽ കൂടുതൽ വ്യക്തത ലഭിക്കുമെന്നാണ് പോലീസ് നൽകുന്ന സൂചന.
The body of Mohandas, the tribal chieftain of Konni Kattathi Unnathi who went missing a month ago, has been found
