ജില്ലയിലെ പത്താംതരം, ഹയര്‍ സെക്കന്‍ഡറി യോഗ്യതയില്ലാത്തവര്‍ക്കായി പത്തനംതിട്ട ജില്ലാ പഞ്ചായത്ത് പുതിയ പദ്ധതിക്ക് തുടക്കം കുറിച്ചു. ‘വിദ്യാശ്രീ’ എന്ന് പേരിട്ടിരിക്കുന്ന ഈ സൗജന്യ തുല്യത പദ്ധതിയുടെ ലോഗോ പ്രകാശനം ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടന്നു. ഒക്ടോബര്‍ 15 വരെയാണ് പദ്ധതിയിലേക്ക് അപേക്ഷിക്കാനുള്ള സമയം.
ജില്ലാ പഞ്ചായത്ത് പ്രസിഡണ്ട് ദീനാമ്മ റോയി, ആരോഗ്യ വിദ്യാഭ്യാസ സ്ഥിരം സമിതി ചെയര്‍പേഴ്‌സണ്‍ ശ്രീനാദേവി കുഞ്ഞമ്മയ്ക്ക് നല്‍കിയാണ് വിദ്യാശ്രീ പദ്ധതിയുടെ ലോഗോ പ്രകാശനം ചെയ്തത്. ജില്ലയിലെ അർഹരായ പഠിതാക്കളെ ഗ്രാമപഞ്ചായത്തുകളുടെ സഹകരണത്തോടെ കണ്ടെത്തി രജിസ്‌ട്രേഷന്‍ നടത്താനാണ് പദ്ധതി ലക്ഷ്യമിടുന്നത്. ഓരോ 60 പഠിതാക്കള്‍ക്കും വേണ്ടി ജില്ലയുടെ വിവിധ മേഖലകളില്‍ പത്താംതരം, ഹയര്‍ സെക്കന്‍ഡറി ക്ലാസുകള്‍ ആരംഭിക്കും. ഞായറാഴ്ചകളിലും പൊതു അവധി ദിവസങ്ങളിലുമായിരിക്കും ക്ലാസുകൾ ക്രമീകരിക്കുക.
17 വയസ്സ് പൂര്‍ത്തിയായ ഏഴാം തരം വിജയിച്ചവര്‍ക്കും, എട്ടു മുതല്‍ പത്ത് വരെ ക്ലാസുകളില്‍ പഠനം അവസാനിപ്പിച്ചവര്‍ക്കും പത്താംതരം തുല്യത കോഴ്‌സിലേക്ക് സൗജന്യമായി രജിസ്‌ട്രേഷന്‍ ചെയ്യാം. ഇതിന് ഉയര്‍ന്ന പ്രായപരിധിയില്ല. 22 വയസ്സ് പൂര്‍ത്തിയായ പത്താംതരം ജയിച്ചവര്‍ക്കും പ്ലസ് ടു അല്ലെങ്കിൽ പ്രീ ഡിഗ്രി പരാജയപ്പെട്ടവര്‍ക്കും ഹയര്‍ സെക്കന്‍ഡറി തുല്യത കോഴ്‌സിലേക്ക് അപേക്ഷിക്കാം.
അപേക്ഷകര്‍ ബന്ധപ്പെട്ട ഗ്രാമപഞ്ചായത്ത് പരിധിയില്‍ ഉള്ളവര്‍ ആയിരിക്കണം. താത്പര്യമുള്ളവര്‍ ഒക്ടോബര്‍ 15 ന് മുമ്പ് അതാത് ഗ്രാമപഞ്ചായത്തിലെ പ്രേരകുമാരുമായി ബന്ധപ്പെട്ട് അപേക്ഷ സമര്‍പ്പിക്കേണ്ടതാണ്. കൂടുതൽ വിവരങ്ങൾക്ക് 0468 2220799 എന്ന ഫോൺ നമ്പറിൽ ബന്ധപ്പെടാം.
അധ്യാപക അവസരങ്ങൾ:
ഈ പദ്ധതിയിൽ അധ്യാപകരായി സേവനമനുഷ്ഠിക്കാൻ താല്പര്യമുള്ളവരിൽ നിന്നും അപേക്ഷ ക്ഷണിച്ചിട്ടുണ്ട്. പത്താംതരം ക്ലാസുകൾ എടുക്കാൻ അതാത് വിഷയങ്ങളില്‍ ബിരുദവും ബി.എഡും ഉള്ളവര്‍ക്ക് അപേക്ഷിക്കാം. ഹയര്‍ സെക്കന്‍ഡറി തുല്യത കോഴ്‌സിൽ അധ്യാപകരാകാന്‍ ബിരുദാനന്തര ബിരുദം, ബി.എഡ്, സെറ്റ് (SET) എന്നിവ നിര്‍ബന്ധമാണ്.
pathanamthitta
