പത്തനംതിട്ട: പത്തനംതിട്ട ജില്ലാ കരാട്ടെ - ഡോ അസോസിയേഷന്റെ നേതൃത്വത്തിൽ ജില്ലയിലെ വിവിധ കരാട്ടെ സ്കൂളുകളിലെ കുട്ടികൾക്കായി “റെഫറി പരിശീലനം” സംഘടിപ്പിച്ചു. പത്തനംതിട്ടയിൽ വെച്ച് നടന്ന പരിശീലന പരിപാടി ജില്ലാ പ്രസിഡന്റ് പ്രസാദ് ജോൺ മാമ്പ്ര ഉദ്ഘാടനം ചെയ്തു.
ജില്ലയിലെ വിവിധ കരാട്ടെ അസോസിയേഷനുകളിൽ നിന്ന് തെരെഞ്ഞെടുക്കപ്പെട്ട കുട്ടികളാണ് ഈ പ്രത്യേക ക്യാമ്പിൽ പങ്കെടുത്തത്. പ്രമുഖ കരാട്ടെ പരിശീലകൻ സുനിൽ ഇലപ്പുഴ പരിശീലനത്തിന് നേതൃത്വം നൽകി.
വേൾഡ് കരാട്ടെ ഫെഡറേഷന്റെ (World Karate Federation - WKF) അന്താരാഷ്ട്ര നിയമങ്ങളും പ്രധാന ശൈലികളും രീതികളും ഉൾപ്പെടുത്തിയുള്ളതായിരുന്നു പരിശീലനം. ഇത് മത്സരങ്ങളിൽ പങ്കെടുക്കുന്ന കുട്ടികൾക്ക് ഏറെ ഗുണം ചെയ്യും.
ഈ ക്യാമ്പിന്റെ തുടർച്ചയായി ഇതേ മാസം (ഒക്ടോബർ) 20-ാം തീയതി വീണ്ടും പരിശീലനം നടക്കും. തുടർന്ന് 2026 നവംമ്പർ മാസം പത്തനംതിട്ടയിൽ വെച്ച് നടത്തുന്ന എഴുത്ത് പരീക്ഷ, പ്രാക്ടിക്കൽ പരീക്ഷകൾ എന്നിവ വിജയകരമായി പൂർത്തിയാക്കുന്നവർക്ക് ഒഫീഷൽ റെഫറിയായി കരാട്ടെ കേരള അസോസിയേഷന്റെ (Karate Kerala Association - KKA) ഔദ്യോഗിക അംഗീകാരം ലഭിക്കും. ഇതോടെ ഇവർക്ക് ജില്ലാ - സംസ്ഥാന തലങ്ങളിലെ കോമ്പറ്റീഷനുകളിൽ (Championships) ഒഫീഷ്യൽ റെഫറിയായി പ്രവർത്തിക്കുവാനും യോഗ്യത ലഭിക്കും.
ഇന്റർനാഷണൽ ഒളിംമ്പിക്ക് കമ്മറ്റി (International Olympic Committee - IOC) അംഗീകരിച്ച ചാമ്പ്യൻഷിപ്പുകളിൽ പങ്കെടുക്കുവാനും ഒഫീഷ്യൽ റെഫറിയായും ജഡ്ജായും പ്രവർത്തിക്കാനും അവസരം നൽകുന്ന കരാട്ടെ ഇന്ത്യാ ഓർഗനൈസേഷന്റെ (Karate India Organisation - KIO) അംഗീകാരമുള്ള ജില്ലാ ഘടകമാണ് പത്തണംതിട്ട ജില്ലാ കരാട്ടെ - ഡോ അസോസിയേഷൻ. പത്തനംതിട്ട ജില്ലയിലെ അസോസിയേഷനുകളിലെ കുട്ടികൾക്ക് കായികരംഗത്ത് മികച്ച അവസരമാണ് ഇതിലൂടെ തുറന്നു കിട്ടുന്നത്.
ഷാജി ജോസഫ് അദ്ധ്യക്ഷത വഹിച്ച ഉദ്ഘാടന യോഗത്തിൽ ബിനു ഡാനിയേൽ, മുഹമ്മദ് ഷാജു, അനിൽ ഡൊമിനിക്ക് എന്നിവർ ആശംസകൾ അർപ്പിച്ചു സംസാരിച്ചു.
Referee Training Camp
