പന്തളത്തെത്തുന്ന തീർഥാടകരുടെ വലിയ വാഹനങ്ങളുടെ പാർക്കിങ് പ്രശ്നമാകുന്നു
പന്തളം : പന്തളത്തെത്തുന്ന തീർഥാടകരുടെ വലിയവാഹനങ്ങൾ നിർത്തിയിടാൻ സ്ഥല സൗകര്യമില്ലാത്തത് പ്രശ്നമായതോടെ പന്തളം കൊട്ടാരം കൈപ്പുഴ കരയിൽ പാർക്കിങ്ങിനെടുത്ത സ്ഥലത്ത് വെള്ളവും വെളിച്ചവും സൗകര്യങ്ങളുമൊരുക്കാൻ റവന്യൂവകുപ്പ് മുന്നിട്ടിറങ്ങുന്നു. വില്ലേജോഫീസറുടെ നേതൃത്വത്തിൽ സ്ഥലം സന്ദർശിച്ച് വിശദമായ റിപ്പോർട്ട് കഴിഞ്ഞദിവസം നൽകിയിട്ടുണ്ട്. ഇതിനിടെ വാഹനങ്ങൾ ധാരാളം പാർക്കിങ്ങിനായി മൈതാനത്തേക്കെത്തിത്തുടങ്ങിയിട്ടുമുണ്ട്.
ശൗചാലയം, കുടിവെള്ളം, വെളിച്ചം, സമീപത്തായുള്ള കുളത്തിന് സമീപം സുരക്ഷാസംവിധാനം എന്നിവയാണ് ഇവിടെ ഒരുക്കേണ്ടത്. കൈപ്പുഴ കരയിലുള്ള സ്വകാര്യവ്യക്തിയുടെ സ്ഥലമാണ് കൊട്ടാരം വാടകയ്ക്കെടുത്ത് സൗജന്യപാർക്കിങ് സൗകര്യം ഒരുക്കിയിട്ടുള്ളത്. മറ്റ് സംസ്ഥാനങ്ങളിൽ നിന്നെത്തുന്ന തീർഥാടകരുടേതുൾപ്പെടെ വലിയ വാഹനങ്ങൾ നിർത്തിയിടുവാനുള്ള സൗകര്യമില്ലാത്ത സ്ഥലമാണ് പന്തളം. ഇതുകൊണ്ടുതന്നെ ധാരാളം തീർഥാടകർ ഇവിടെ ഇറങ്ങാതെ പോകുന്നുമുണ്ട്.
ഇതിന് പരിഹാരമെന്നനിലയിലാണ് ഇത്തവണ കൊട്ടാരം മുപ്പതോളം വാഹനം ഒരേസമയം നിർത്തിയിടാൻ കഴിയുന്ന തരത്തിലുള്ള മൈതാനം കൈപ്പുഴയിൽ കണ്ടെത്തിയത്. ഇവിടെനിന്നും തീർഥാടകർക്ക് കൈപ്പുഴ ക്ഷേത്രത്തിലും കൊട്ടാരത്തിലും പോകുവാനും തൂക്കുപാലം വഴി വലിയകോയിക്കൽ ക്ഷേത്രത്തിലെത്തിച്ചേരുവാനും കഴിയും.
pandalam parking
