കാത്തിരിപ്പുകേന്ദ്രമില്ലാതെ കുമ്പനാട് ബസ് സ്റ്റോപ്പ് ;നിന്ന് വലഞ്ഞു യാത്രക്കാർ
കുമ്പനാട് ∙ കാത്തിരിപ്പുകേന്ദ്രമില്ലാതെ ബസ് സ്റ്റോപ്പുകൾ. ഒട്ടെറെ യാത്രക്കാർ ദിവസവും ബസ് കാത്തു നിൽക്കുന്ന ജംക്‌ഷനിലാണ് കാത്തിരിപ്പു കേന്ദ്രമില്ലാത്തത്. മഴയായാലും വെയിലായാലും യാത്രക്കാർ എല്ലാം സഹിച്ച് റോഡിൽ തന്നെ നിൽക്കണം. കുമ്പനാട് ജംക്‌ഷനിൽ തിരുവല്ല ഭാഗത്തേക്കുള്ള ബസുകൾ അക്ഷയ കേന്ദ്രത്തിനു മുൻപിലാണ് നിർത്തുന്നത്. കോഴഞ്ചേരി ഭാഗത്തേക്കുള്ള ബസുകൾ എതിർവശവും. ഇവിടെ രണ്ടിടത്തും കാത്തിരിപ്പു കേന്ദ്രമില്ല. യാത്രക്കാർക്കു കയറിനിൽക്കാനുള്ള വീതിയും റോഡിനില്ല. ടികെ റോഡിന്റെ ടാറിങ് കഴിഞ്ഞ് വെള്ളവര വരച്ചപ്പോൾ റോഡുവശത്തുകൂടിയാണ് ഇരുഭാഗത്തും വര കടന്നുപോകുന്നത്. വരകൾക്കുള്ളിലുള്ള ഭാഗം വാഹനങ്ങൾക്കു പോകാനുള്ളതാണ്. അതിനു പുറത്തു മാത്രമേ നടന്നുപോകാനും ബസ് കാത്തു നിൽക്കാനും കഴിയുകയുള്ളു.
കുമ്പനാട് വടക്കേകവലയുടെ സ്ഥിതിയും ഇതുതന്നെയാണ്. ഇവിടെയും ഇരുഭാഗത്തും ബസ് കാത്തിരിപ്പു കേന്ദ്രമില്ല. കുമ്പനാട് കഴിഞ്ഞാൽ കോഴഞ്ചേരി ഭാഗത്തേക്ക് അടുത്ത സ്റ്റോപ്പ് മുട്ടുമണ്ണിലാണ്. ഇവിടെ തിരുവല്ല ഭാഗത്തേക്കു പോകാനുള്ളവർക്കു 4 പൈപ്പിൽ താങ്ങിനിർത്തിയ ഒരു ഷീറ്റിട്ട കേന്ദ്രം ഉണ്ടായിരുന്നു. ഇതാർക്കും ഉപയോഗിക്കാൻ പറ്റാത്തതിനാൽ വെറുതെ നിൽക്കുകയാണ്.
ടികെ റോഡിൽ കുമ്പനാട് മുതൽ പുല്ലാട് വരെ നല്ല കാത്തിരിപ്പു കേന്ദ്രം ഉള്ളത് പുല്ലാട് ജംക്‌ഷനിൽ കോഴഞ്ചേരി ഭാഗത്തേക്കു പോകുന്ന ഭാഗത്തു മാത്രമാണ്. ഇവിടെയാകട്ടെ ബസ് ബേ ഉണ്ടെങ്കിലും ബസ് കയറാറില്ല. എല്ലാവരും റോഡിൽ നിർത്തി ആളെ ഇറക്കി പോകും. അതുകൊണ്ട് യാത്രക്കാർക്ക് പ്രയോജനമില്ലാത്ത കാത്തിരിപ്പുകേന്ദ്രമായി ഇതു മാറി.
Kumbanad bus stop without a waiting shed; passengers struggle standing
