വടശ്ശേരിക്കരയില്‍ ജനവാസ മേഖലകളിൽ കാട്ടാന ശല്യം രൂക്ഷം
വടശ്ശേരിക്കര : വടശ്ശേരിക്കര പഞ്ചായത്തിലെ വിവിധ ഭാഗങ്ങളിൽ കാട്ടാനക്കൂട്ടത്തിന്റെ സാന്നിധ്യം ജനങ്ങളിൽ ഭീതി പരത്തുന്നു. പഞ്ചായത്തിലെ ബൗണ്ടറി, ചിറക്കൽ, എം.ആർ.എസ്. സ്കൂൾ ഭാഗങ്ങളിലാണ് ചൊവ്വാഴ്ച രാത്രിയിലും ബുധനാഴ്ച രാവിലെയുമായി ആനകൾ കൂട്ടത്തോടെ ജനവാസ മേഖലകളിൽ എത്തിയത്. രാത്രികാലങ്ങളിൽ കൃഷിയിടങ്ങില്‍ ഇറങ്ങുന്ന ആനക്കൂട്ടം വ്യാപകമായി കർഷകരുടെ കാർഷിക വിളകൾ നശിപ്പിക്കുകയാണ്. എന്നാൽ നേരം പുലർന്ന് വെളിച്ചം പരക്കുന്നതോടെ ഇവ തിരികെ കാട്ടിലേക്ക് തന്നെ മടങ്ങുന്നതാണ് പതിവ്. നിരന്തരമായുണ്ടാകുന്ന ഈ ആന ശല്യം പ്രദേശത്തെ കർഷകരെയും നാട്ടുകാരെയും വലിയ ആശങ്കയിലാഴ്ത്തിയിട്ടുണ്ട്. ജനവാസ മേഖലകളിലെ കാട്ടാനകളുടെ സാന്നിധ്യത്തിന് ശാശ്വത പരിഹാരം കാണണമെന്നും വനം വകുപ്പ് അധികാരികൾ അടിയന്തിര നടപടി സ്വീകരിക്കണമെന്നും നാട്ടുകാരുടെ ഭാഗത്തുനിന്ന് ശക്തമായ ആവശ്യമുയരുന്നുണ്ട്.
Wild elephant menace intensifies in residential areas of Vadasserikkara
