നാട്ടുകാർക്ക് ‘ഇരട്ടിപ്പണി’ നൽകി ജനറൽ ആശുപത്രിക്ക് സമീപത്തെ നടപ്പാത നവീകരണം
പത്തനംതിട്ട∙ സ്ലാബ് തകർന്നതിനെ തുടർന്ന് ഓടയിൽ വീണ് വലഞ്ഞ വഴിയാത്രക്കാരെ വീണ്ടും ദുരിതത്തിലാക്കി അധികൃതർ. പകരം സ്ഥാപിച്ച സ്ലാബിൽ കാൽ തട്ടി തെറിച്ച് വീഴുന്ന സ്ഥിതിയാണിപ്പോൾ. ടികെ റോഡിൽ പത്തനംതിട്ട ജനറൽ ആശുപത്രിക്ക് സമീപത്താണ് ഈ സ്ഥിതി. ഈ വഴിയെത്തിയ വയോധികയുടെ കാൽ, തകർന്ന സ്ലാബിനുള്ളിൽ അകപ്പെട്ടത് കഴിഞ്ഞ ദിവസമാണ്. പരാതി വ്യാപകമായതോടെയാണ് തകർന്ന സ്ലാബ് മാറ്റിയിടാൻ പൊതുമരാമത്ത് വകുപ്പ് അധികൃതർ തയാറായത്. ഇപ്പോൾ സ്ഥാപിച്ചിട്ടുള്ള സ്ലാബിന്റെ നിരപ്പ് പാതയിൽ നിന്നും ഉയർന്ന് നിൽക്കുന്നതാണ് അപകടത്തിന് കാരണമായിട്ടുള്ളത്.മാറ്റിയിട്ട സ്ലാബാകട്ടെ 2 ഇഞ്ചോളം ഉയർന്നു നിൽക്കുന്നത് കാൽനട യാത്രക്കാർക്ക് ഭീഷണിയാണ് .ഈ വഴി സഞ്ചരിക്കുന്ന കാൽനടയാത്രക്കാർ പാതയിലെ ചതിക്കുഴി പെട്ടെന്ന് തിരിച്ചറിയുകയുമില്ല.
നഗരത്തിന്റെ പല ഭാഗങ്ങളിലും ഇതേ അവസ്ഥ തന്നെയാണ്. തിരക്കേറിയ ഭാഗങ്ങളിൽപ്പോലും അപകടം ഒളിഞ്ഞിരിപ്പുണ്ട്. പത്തനംതിട്ട കാതോലിക്കേറ്റ് കോളജ് റോഡിലെ ബസ് സ്റ്റോപ്പിലെ സ്ലാബുകൾ തകർന്നിട്ട് ഏറെ നാളുകളായി. ഇതിൽ കാൽ അകപ്പെട്ടാൽ ഗുരുതര പരുക്ക് ഉറപ്പാണ്.
PEDESTRIAN
