ലോകമെമ്പാടും കോടിക്കണക്കിന് ആരാധകരുള്ള പ്രമുഖ രാജ്യാന്തര ഫാസ്റ്റ് ഫുഡ് ശൃംഖലയായ കെഎഫ്സിയിൽ വീണ്ടും ഗുരുതര ഭക്ഷ്യസുരക്ഷാ വീഴ്ച. പ്രമുഖ വിനോദസഞ്ചാര കേന്ദ്രമായ തിരുവനന്തപുരം വർക്കലയിലെ കെഎഫ്സി ഔട്ട്ലെറ്റിൽ നിന്ന് വലിയ അളവിൽ പഴകിയ ചിക്കൻ പിടികൂടി. വർക്കല നഗരസഭ ആരോഗ്യവിഭാഗം നടത്തിയ അടിയന്തര പരിശോധനയിലാണ് ഇരുന്നൂറോളം കിലോ പഴകിയ ഇറച്ചി പിടിച്ചെടുത്തത്.
കേരളത്തിലെ പ്രമുഖ ടൂറിസ്റ്റ് കേന്ദ്രമായ വർക്കല മൈതാനം ബീച്ച് റോഡിന് സമീപമുള്ള കെഎഫ്സി ഔട്ട്ലെറ്റിലാണ് നഗരസഭ ആരോഗ്യവിഭാഗം മിന്നൽ പരിശോധന നടത്തിയത്. ഉപഭോക്താവ് നൽകിയ പരാതിയുടെ അടിസ്ഥാനത്തിലായിരുന്നു നടപടി.രണ്ട് കിലോ വീതമുള്ള 90 പാക്കറ്റുകളിലായി സൂക്ഷിച്ചിരുന്ന പഴകിയ മാംസമാണ് ഉദ്യോഗസ്ഥർ കണ്ടെടുത്തത്. പാചകപ്പുരയ്ക്കുള്ളിൽ തികച്ചും വൃത്തിഹീനമായ സാഹചര്യത്തിലാണ് ഈ ചിക്കൻ സൂക്ഷിച്ചിരുന്നത്.
ഫ്രീസറുകളിൽ കൃത്യമായ താപനിലയിൽ സൂക്ഷിക്കേണ്ട ഇറച്ചി, രക്തം ഒലിച്ച നിലയിൽ തറയിലാണ് ഉദ്യോഗസ്ഥർ കണ്ടെത്തിയത്.പ്രത്യേക ഓഫറുകൾ പ്രഖ്യാപിച്ച് വലിയ രീതിയിൽ ആളുകളെ ആകർഷിച്ച് വിൽപ്പന നടത്തുന്നതിനിടയിലായിരുന്നു ആരോഗ്യവിഭാഗത്തിന്റെ ഈ നിർണായക ഇടപെടൽ. പിടിച്ചെടുത്ത ടൺ കണക്കിന് പഴകിയ ചിക്കൻ നഗരസഭാ അധികൃതർ ഉടൻ തന്നെ നശിപ്പിച്ചു.
KFC stale chicken
