അയിരൂർ സ്വദേശിയായ യുവാവിനെയും ബന്ധുവിനെയും വെട്ടിക്കൊലപ്പെടുത്താൻ ശ്രമിച്ചയാൾ അറസ്റ്റിൽ
കോയിപ്രം : അയിരൂർ സ്വദേശിയായ യുവാവിനെയും ബന്ധുവിനെയും വെട്ടിയും കുത്തിയും കൊലപ്പെടുത്താൻ ശ്രമിച്ച കേസിലെ പ്രതിയെ കോയിപ്രം പോലീസ് അറസ്റ്റുചെയ്തു. വെള്ളിയറ അഞ്ചുപുരക്കൽ സ്വദേശി പ്ലാങ്കമൺ പുളിമൂട്ടിൽ പി.ആർ. രാജീവ് (33) ആണ് പിടിയിലായത്. ജൂൺ 21-ന് വൈകീട്ടാണ് സംഭവം.
പ്രതിയും അയൽവാസിയായ സുജിയും തമ്മിലുള്ള വഴിത്തർക്കത്തിന്റെ പേരിൽ സുജിയുടെ വീട്ടിൽ ഒരു പിച്ചാത്തിയുമായി എത്തിയ പ്രതി വീട്ടിൽ അതിക്രമിച്ചു കടന്ന് സുജിയുടെ വയറിനും വലതുകൈയിലും കുത്തി. തടയാൻ ചെന്ന ബന്ധു സൈമണിനെ നെഞ്ചിലും ശരീരമാസകലവും കുത്തി. തുടർന്ന് പ്രതി സ്ഥലത്തുനിന്ന് ഓടിരക്ഷപ്പെട്ടു. പരിക്കേറ്റവർ കോഴഞ്ചേരി ജില്ലാ ആശുപത്രിയിൽ ചികിത്സതേടി. ആക്രമിക്കാൻ ഉപയോഗിച്ച പിച്ചാത്തി പോലീസ് പിന്നീട് കണ്ടെടുത്തു.
എസ്.എച്ച്.ഒ. എം.ഉമേഷ്, എസ്.ഐ. മിഥുൻ അശോക്, എസ്.സി.പി.ഒ.മാരായ സുരേഷ്, അഭിലാഷ്, ഷബാന, സി.പി.ഒ.മാരായ പരശുറാം, അനന്തു എന്നിവർ അടങ്ങിയ അന്വേഷണസംഘമാണ് പ്രതിയെ അറസ്റ്റുചെയ്തത്. കോടതിയിൽ ഹാജരാക്കിയ പ്രതിയെ റിമാൻഡുചെയ്തു.
arrest
