പത്തനംതിട്ട: കുമ്പഴയിൽ ടോറസ് ലോറിയും സ്കൂട്ടറും കൂട്ടിയിടിച്ച് വീട്ടമ്മയ്ക്ക് ദാരുണാന്ത്യം. കോന്നി പുളിമുക്ക് ഉഷാ ഭവനത്തിൽ ഉഷാ കുമാരി (59) ആണ് മരിച്ചത്. ഇന്ന് രാവിലെ ആറരയോടെ കുമ്പഴ ജംഗ്ഷനിലായിരുന്നു അപകടം സംഭവിച്ചത്. ഭർത്താവ് സുരേന്ദ്രനൊപ്പം മലയാലപ്പുഴ ദേവീക്ഷേത്രത്തിൽ ദർശനം നടത്തി മടങ്ങിവരുന്നതിനിടെയാണ് അപകടം സംഭവിച്ചത്. ഇവർ സഞ്ചരിച്ചിരുന്ന സ്കൂട്ടർ മലയാലപ്പുഴ റോഡിൽ നിന്നും സംസ്ഥാന പാതയിലേക്ക് പ്രവേശിക്കുന്ന സമയത്ത് പുനലൂർ ഭാഗത്തുനിന്നും റാന്നി റോഡിലേക്ക് ചരക്കുമായി പോവുകയായിരുന്ന ലോറി ഇടിക്കുകയായിരുന്നു.
അപകടത്തിൽ നിയന്ത്രണം വിട്ട് റോഡിലേക്ക് തെറിച്ചുവീണ ഉഷയുടെ ശരീരത്തിലൂടെ ലോറി കയറി ഇറങ്ങുകയായിരുന്നുവെന്ന് ദൃക്സാക്ഷികൾ പറഞ്ഞു. വീട്ടമ്മയുടെ ഇടത് കൈ പൂർണ്ണമായും തകർന്ന നിലയിലായിരുന്നു. ഇവർ സംഭവസ്ഥലത്തുതന്നെ മരണപ്പെട്ടു.സ്കൂട്ടർ യാത്രക്കാരായ ഉഷാകുമാരിയും ഭർത്താവ് സുരേന്ദ്രനും ഹെൽമെറ്റ് ധരിച്ചിരുന്നു. അപകടത്തിൽ പരിക്കേറ്റ സുരേന്ദ്രന്റെ പരിക്ക് ഗുരുതരമല്ലെന്നാണ് ലഭിക്കുന്ന വിവരം. അപകടസ്ഥലത്ത് ഉടനടി എത്തിയ പത്തനംതിട്ട പോലീസ് തുടർനടപടികൾ സ്വീകരിച്ചു. മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്മോർട്ടത്തിനായി ജനറൽ ആശുപത്രി മോർച്ചറിയിലേക്ക് മാറ്റിയിരിക്കുകയാണ്. കുമ്പഴ മേഖലയിൽ തുടർച്ചയായുണ്ടാകുന്ന വാഹനാപകടങ്ങൾ പ്രദേശവാസികളെ ആശങ്കയിലാക്കുന്നുണ്ട്.
pathanamthitta accident
