പത്തനംതിട്ട: ആറന്മുളയിൽ ഓഗസ്റ്റ് 30-ന് നടക്കുന്ന പ്രശസ്തമായ ഉത്രട്ടാതി ജലമേളയുടെ ഉദ്ഘാടനത്തിനായി ബഹുമാനപ്പെട്ട ഉപരാഷ്ട്രപതി എത്തിച്ചേരുന്നു. ഇതേദിവസം തന്നെ ആറന്മുള എൻജിനീയറിങ് കോളേജിൽ വച്ച് നീറ്റ് (NEET) പരീക്ഷയും നടക്കുന്നുണ്ട്. ഉപരാഷ്ട്രപതിയുടെ സന്ദർശനവും ജലമേളയും കണക്കിലെടുത്ത്, പരീക്ഷയ്ക്കെത്തുന്ന വിദ്യാർത്ഥികളുടെയും രക്ഷിതാക്കളുടെയും സൗകര്യാർത്ഥം ആറന്മുള പോലീസ് പ്രത്യേക മാർഗ്ഗനിർദ്ദേശങ്ങളും ഗതാഗത നിയന്ത്രണങ്ങളും പുറപ്പെടുവിച്ചു.
പ്രധാന നിർദ്ദേശങ്ങൾ താഴെ പറയുന്നവയാണ്:
കോളേജ് പ്രവേശനം: ആറന്മുള എൻജിനീയറിങ് കോളേജിൽ പരീക്ഷ എഴുതുന്ന വിദ്യാർത്ഥികൾക്ക് രാവിലെ 7 മണി മുതൽ തന്നെ കോളേജിനുള്ളിലേക്ക് പ്രവേശിക്കാവുന്നതാണ്.
പരീക്ഷാ സമയം: രാവിലെ 9:00 മണി മുതൽ ഉച്ചയ്ക്ക് 12:30 വരെയാണ് പരീക്ഷാ സമയം ക്രമീകരിച്ചിരിക്കുന്നത്.
രാവിലത്തെ ഗതാഗതം: വിദ്യാർത്ഥികൾ പരീക്ഷയ്ക്കായി കോളേജിലേക്ക് പ്രവേശിക്കുന്ന പ്രഭാത സമയങ്ങളിൽ യാതൊരുവിധ ഗതാഗത നിയന്ത്രണങ്ങളും ഉണ്ടായിരിക്കുന്നതല്ല.
പരീക്ഷയ്ക്ക് ശേഷമുള്ള യാത്രാ ക്രമീകരണങ്ങൾ (പന്തളം ഭാഗത്തേക്ക്): പരീക്ഷ കഴിഞ്ഞ് ഇറങ്ങുന്ന വിദ്യാർഥികൾക്ക് പന്തളം ഭാഗത്തേക്ക് (MC റോഡിലേക്ക്) യാത്ര ചെയ്യുന്നതിന് നിയന്ത്രണങ്ങൾ ഒന്നും തന്നെ ഉണ്ടായിരിക്കില്ല.
പത്തനംതിട്ട ഭാഗത്തേക്ക് പോകേണ്ടവർ (കോഴഞ്ചേരി വഴി): കിടങ്ങന്നൂർ, വല്ലന, കോഴിപ്പാലം വഴി സഞ്ചരിച്ച് ആഞ്ഞിലിമൂട്ടിൽ കടവ് പാലം കടക്കണം.
തുടർന്ന് കോഴഞ്ചേരി-തിരുവല്ല റോഡിൽ പ്രവേശിച്ച് വലത്തോട്ട് തിരിഞ്ഞ് കോഴഞ്ചേരി വഴി പത്തനംതിട്ടയിലേക്ക് പോകാം.
പത്തനംതിട്ട ഭാഗത്തേക്ക് പോകേണ്ടവർ (ഇലന്തൂർ/ഇലവുംതിട്ട വഴി): എൻജിനീയറിങ് കോളേജിൽ നിന്നും ആറന്മുള-പന്തളം റോഡിലെത്തി ഇടത്തോട്ട് തിരിഞ്ഞ് കിടങ്ങന്നൂർ വഴി ഇലന്തൂരിലൂടെയോ ഇലവുംതിട്ടയിലൂടെയോ പത്തനംതിട്ടയിലേക്ക് പോകാവുന്നതാണ്.ചെങ്ങന്നൂർ ഭാഗത്തേക്ക് പോകേണ്ടവർ: കിടങ്ങന്നൂർ, വല്ലന വഴി കോഴിപ്പാലം എത്തിയ ശേഷം ചെങ്ങന്നൂരിലേക്ക് യാത്ര തുടരാം.
പൂർണ്ണ ഗതാഗത നിയന്ത്രണം:ആറന്മുള ഐക്കര ജംഗ്ഷനിലേക്കും, ഐക്കര ജംഗ്ഷൻ മുതൽ തെക്കേമല ജംഗ്ഷൻ വരെയുള്ള റോഡിലും പരിപൂർണ്ണ ഗതാഗത നിയന്ത്രണമായിരിക്കുമെന്ന് ആറന്മുള സർക്കിൾ ഇൻസ്പെക്ടർ അറിയിച്ചു.
പരീക്ഷാർത്ഥികളും ജലമേളയ്ക്ക് എത്തുന്നവരും പോലീസിന്റെ നിർദ്ദേശങ്ങളോട് പൂർണ്ണമായും സഹകരിക്കണമെന്ന് അധികൃതർ അഭ്യർത്ഥിച്ചു.
Aranmula
