കേരള പൊലീസിൽ വനിതാ പ്രാതിനിധ്യം കൂട്ടുന്നു ;സേനയുടെ അംഗബലത്തിന്റെ 30% വനിതകളാകും
പത്തനംതിട്ട ∙ കേരള പൊലീസിൽ വനിതാ പ്രാതിനിധ്യം കൂട്ടുന്നു. പൊലീസ് സേനയുടെ അംഗബലത്തിന്റെ 30% വനിതാ ഉദ്യോഗസ്ഥരെ ആക്കാനാണു തീരുമാനം. നിലവിൽ സിവിൽ പൊലീസ് ഓഫിസർമാരിൽ 10% മാത്രമാണു വനിതകൾ. ഡിജിപി റാവാഡ എ. ചന്ദ്രശേഖർ നൽകിയ ശുപാർശയെ തുടർന്നാണു സർക്കാർ തീരുമാനമെടുത്തത്.പൊലീസ് സേനയുടെ ആകെ അംഗബലത്തിന്റെ 33% വനിതാ പ്രാതിനിധ്യം ഉറപ്പാക്കണമെന്നു സംസ്ഥാനങ്ങൾക്കു കേന്ദ്ര ആഭ്യന്തര മന്ത്രാലയം പലതവണ നിർദേശം നൽകിയിരുന്നു. തുടർന്നാണു പുരുഷ– വനിതാ പൊലീസ് കോൺസ്റ്റബിൾ നിയമന അനുപാതം ഉയർത്തുന്നത്.
വനിതാ പ്രാതിനിധ്യം വർഷം 5 ശതമാനമെന്ന രീതിയിൽ ഘട്ടം ഘട്ടമായി വർധിപ്പിക്കാനാണു തീരുമാനം. ഐപിഎസ് ഉദ്യോഗസ്ഥരിൽ വനിതകൾ ഏറെയുണ്ടെങ്കിലും സിവിൽ പൊലീസ് ഓഫിസർമാരിൽ വനിതകളുടെ എണ്ണം കുറവാണ്. അധിക തസ്തികകൾ സൃഷ്ടിക്കാതെയാകും അനുപാതം ഉയർത്തുക. നിലവിലെ സീനിയോറിറ്റി മാനദണ്ഡങ്ങളിലും നടപടിക്രമങ്ങളിലും മാറ്റം വരുത്തുകയുമില്ല. വനിതകളുടെ എണ്ണം കൂടുന്നതു വഴി സേനയുടെ പ്രവർത്തനക്ഷമതയിലും ദൈനംദിന പ്രവർത്തനങ്ങളിലും ഉണ്ടാകുന്ന മാറ്റങ്ങളും നിലവിലുള്ള പരിശീലന സൗകര്യങ്ങളുടെ പര്യാപ്തതയും വിലയിരുത്തുന്നതിനും പഠനം നടത്തുന്നുമുണ്ട്. രാജ്യത്തെ 10 സംസ്ഥാനങ്ങളിൽ ഇതിനകം വനിതാ പൊലീസ് ഉദ്യോഗസ്ഥരുടെ അനുപാതം 33% ആയി ഉയർത്തിയിട്ടുണ്ട്.
Kerala Police increases women representation; women to constitute 30% of the force's strength
