തിരുവല്ലയിൽ നിയന്ത്രണം വിട്ട കാർ പാലത്തിന്റെ കൈവരി തകർത്ത് തോട്ടിലേക്ക് മറിഞ്ഞു. കാവുംഭാഗം അമ്പിളി ജംഗ്ഷനിലെ പാലത്തിലുണ്ടായ അപകടത്തിൽ കാറിലുണ്ടായിരുന്ന രണ്ട് യുവാക്കൾ അത്ഭുതകരമായി രക്ഷപ്പെട്ടു.
തിരുവല്ല–അമ്പലപ്പുഴ സംസ്ഥാനപാതയിൽ കാവുംഭാഗം അമ്പിളി ജംഗ്ഷനിലെ പാലത്തിൽ ഇന്നലെ ഉച്ചയ്ക്ക് ഒരു മണിയോടെയായിരുന്നു അപകടം. കാവുംഭാഗത്തുനിന്ന് തിരുവല്ല ഭാഗത്തേക്ക് വരികയായിരുന്ന കാർ നിയന്ത്രണം വിട്ട് പാലത്തിന്റെ അപ്രോച്ച് റോഡിലെ കൈവരി തകർത്ത് എട്ടടിയിലേറെ വെള്ളമുള്ള തോട്ടിലേക്ക് പതിക്കുകയായിരുന്നു.
പാലത്തിനടിയിലൂടെ കടന്നുപോകുന്ന വലിയ ജലവിതരണ പൈപ്പിൽ തട്ടി കാർ നിന്നതിനാലാണ് വൻ ദുരന്തം ഒഴിവായത്. കോയിപ്രം സ്വദേശികളായ യുവാക്കൾ പരിക്കുകളില്ലാതെ രക്ഷപ്പെട്ടു. യുവാക്കൾ മദ്യലഹരിയിലായിരുന്നുവെന്ന് നാട്ടുകാർ ആരോപിച്ചു. അപകടത്തെത്തുടർന്ന് സംസ്ഥാനപാതയിൽ അരമണിക്കൂറോളം ഗതാഗതം തടസപ്പെട്ടു.
accident
