റാന്നി പലചരക്ക് കടയിൽ വിദേശമദ്യ വില്പന ,വ്യാപാരി അറസ്റ്റിൽ
റാന്നി: ഇട്ടിയപ്പാറ കോളജ് റോഡിലെ പലചരക്ക് കട കേന്ദ്രീകരിച്ച് നിയമവിരുദ്ധമായി നടത്തിവന്ന വിദേശമദ്യ വില്പന റാന്നി എക്സൈസ് സംഘം പിടികൂടി. സംഭവത്തിൽ പഴവങ്ങാടി ഇട്ടിയപ്പാറ വാവോലിയിൽ തോമസ് എബ്രഹാമിനെ അറസ്റ്റ് ചെയ്തു. കടയ്ക്കുള്ളിൽ സൂക്ഷിച്ചിരുന്ന 16 ബോട്ടിലുകളിലായി 8 ലിറ്റർ വിദേശമദ്യവും മദ്യവിൽപ്പനയിലൂടെ ലഭിച്ച 3,000 രൂപയും എക്സൈസ് പിടിച്ചെടുത്തു. ഇട്ടിയപ്പാറ ടൗണിൽ പലചരക്ക് കടയുടെ മറവിൽ മദ്യവില്പന നടക്കുന്നുണ്ടെന്ന പരാതിയെ തുടർന്ന് റാന്നി എക്സൈസ് സർക്കിൾ ഇൻസ്പെക്ടർ സച്ചിൻ എസ്.എസിന്റെ നേതൃത്വത്തിലുള്ള സംഘം വ്യാഴാഴ്ച ഉച്ചയ്ക്ക് 3 മണിയോടെയാണ് പരിശോധന നടത്തിയത്. അറസ്റ്റ് ചെയ്ത പ്രതിയെ റാന്നി കോടതിയിൽ ഹാജരാക്കി റിമാൻഡ് ചെയ്തു. അസിസ്റ്റന്റ് ഇൻസ്പെക്ടർമാരായ ഹരിഹരൻ ഉണ്ണി, ശ്രീകുമാർ പി., സിവിൽ എക്സൈസ് ഓഫീസർമാരായ രതീഷ് ആർ.വി., അഫ്സൽ നാസർ, ഡ്രൈവർ സുരേഷ് കുമാർ എസ്. എന്നിവരും എക്സൈസ് പരിശോധനാ സംഘത്തിൽ ഉണ്ടായിരുന്നു.
Foreign liquor sales at Ranni grocery store; trader arrested
