സുരക്ഷിത യാത്രയ്ക്ക് വഴിയൊരുക്കി വനപാലകർ
സീതത്തോട്∙ ഗവി–ആങ്ങമൂഴി റൂട്ടിൽ ഗതാഗതത്തിനു തടസ്സമായി റോഡിലേക്കു ചാഞ്ഞ് കിടന്ന ഈറ്റകൾ വനപാലകരുടെ നേതൃത്വത്തിൽ മുറിച്ച് മാറ്റി തുടങ്ങി. ഇന്നലെ ആങ്ങമൂഴി മുതൽ കക്കി വരെയുള്ള ഭാഗത്തെ ഈറ്റകളാണ് ഗൂഡ്രിക്കൽ റേഞ്ച് ഓഫിസർ എ.എസ്.അശോകന്റെ നേതൃത്വത്തിലുള്ള വനപാലക സംഘം മുറിച്ച മാറ്റിയത്.മരാമത്ത് വകുപ്പിന്റെ അധീനതയിലാണ് ഈ റോഡ്. ദിവസവും 50ൽ അധികം വാഹനങ്ങൾ ഇതു വഴി പോകുന്നുണ്ട്.
ഒട്ടേറെ സ്ഥലത്ത് ഈറ്റകൾ റോഡിലേക്കു വീണ് കിടക്കുന്നതു കാരണം ഡ്രൈവിങ് വളരെ പ്രയാസകരമാണ്. റോഡ് വക്കിൽ കാട്ടാന അടക്കമുള്ള വന്യ മൃഗങ്ങൾ നിന്നാൽ കാണാൻ കൂടി കഴിയാത്ത സ്ഥിതിയാണ്.മഴക്കാലത്ത് ഈറ്റകളിൽ വെള്ളം പിടിക്കുന്നതോടെ റോഡ് വക്കിൽ നിൽക്കുന്നവ റോഡിലേക്കു വളഞ്ഞു തൂങ്ങും. റോഡിന്റെ ഇരുവശത്തെയും കാടുകൾ വെട്ടിതെളിച്ചിട്ടു മാസങ്ങളായി. ഒരു വാഹനത്തിനു കഷ്ടിച്ചു പോകുന്നതിനുള്ള വീതി മാത്രമാണ് ഇവിടെ ഉള്ളത്.
forest officers
