സീതത്തോട് ∙ പത്തനംതിട്ട–ഗവി–കുമളി റൂട്ടിൽ സർവീസ് നടത്തുന്ന കെഎസ്ആർടിസി ബസ് മൂഴിയാർ വാൽവ് ഹൗസിനു സമീപം തകരാറിലായതിനെ തുടർന്ന് രണ്ട് മണിക്കൂറോളം യാത്രക്കാർ വനത്തിൽ കുടുങ്ങി. ഉച്ചയോടെ പത്തനംതിട്ട ഡിപ്പോയിൽ നിന്ന് മെക്കാനിക് എത്തി തകരാർ പരിഹരിച്ചതിനെ തുടർന്നാണ് യാത്ര തുടരാനായത്.
പത്തനംതിട്ട ഡിപ്പോയിൽ നിന്ന് ഇന്നലെ രാവിലെ ആറരയ്ക്കു പുറപ്പെടുന്ന ബസാണ് തകരാറിനെ തുടർന്ന് വഴിയിലായത്. 35 യാത്രക്കാർ ഉണ്ടായിരുന്നു. വാൽവ് ഹൗസിനു സമീപത്തെ വളവ് തിരിയുന്നതിനിടെ രാവിലെ ഒൻപതരക്കാണ് തകരാറിലാകുന്നത്. ഗിയർ മാറാൻ കഴിയാഞ്ഞതാണ് തകരാറിനു കാരണം. ബസ് ജീവനക്കാർ തകരാർ പരിഹരിക്കാനുള്ള ശ്രമം നടത്തിയെങ്കിലും വിജയിച്ചില്ല.
കഴിഞ്ഞ രണ്ട് മാസത്തിനുള്ളിൽ ഒട്ടേറെ തവണ ഗവി റൂട്ടിലെ ബസുകൾ വഴിയിൽ കുടുങ്ങിയത് വിവാദമായതിനെ തുടർന്ന് കണ്ടിഷനുള്ള ബസുകൾ മാത്രമേ ഗവിയിലേക്ക് അയ്ക്കാവൂ എന്ന് ഉന്നതതല നിർദേശം ഉണ്ട്. എന്നിട്ടും സർവീസ് നടത്തുന്ന മിക്ക വഴിയിൽ കുടുങ്ങുന്ന സ്ഥിതിയാണ്.
kerala-ksrtc-bus-breakdown-delay
