പമ്പ മലിനമാക്കുന്നത് തടയാൻ കർശന നിർദേശങ്ങളുമായി ഹൈക്കോടതി
ശബരിമല തീർഥാടകർ പമ്പാ നദിയിൽ വസ്ത്രങ്ങളും മറ്റു മാലിന്യങ്ങളും ഉപേക്ഷിക്കുന്നത് തടയാൻ കർശന നിർദേശങ്ങളുമായി ഹൈക്കോടതി. തീർഥാടകർ സഞ്ചരിക്കുന്ന കെഎസ്ആർടിസി ബസുകളിലും ബസ് സ്റ്റാൻഡുകളിലും പമ്പയുടെ ശുചിത്വം പാലിക്കണമെന്ന സന്ദേശം വിവിധ ഭാഷകളിൽ നിശ്ചിത ഇടവേളകളിൽ കേൾപ്പിക്കണം. ഇതിനായി റെക്കോർഡ് ചെയ്ത ഓഡിയോ കെഎസ്ആർടിസിക്കു ദേവസ്വം ബോർഡ് കൈമാറണമെന്ന് ജസ്റ്റിസ് വി.രാജ വിജയരാഘവൻ, ജസ്റ്റിസ് കെ.വി.ജയകുമാർ എന്നിവരുൾപ്പെട്ട ഡിവിഷൻ ബെഞ്ച് നിർദേശിച്ചു.
പ്ലാസ്റ്റിക്, ഷാംപൂ കവറുകൾ, കൃത്രിമ കുങ്കുമം എന്നിവ ഉപയോഗിക്കുന്നത് ഒഴിവാക്കണമെന്നും സന്ദേശങ്ങളിൽ ഉൾപ്പെടുത്തണം. എരുമേലി ദേവസ്വം ബോർഡ് പാർക്കിങ് ഗ്രൗണ്ടിലെ മാലിന്യങ്ങൾ ഉടനടി നീക്കം ചെയ്യണമെന്നും പാർക്കിങ് നിരക്കും സമയപരിധിയും വ്യക്തമാക്കുന്ന ബോർഡുകൾ സ്ഥാപിക്കണമെന്നും കോടതി ഉത്തരവിട്ടു. പമ്പ, സന്നിധാനം, എരുമേലി എന്നിവിടങ്ങളിൽ ശുചിത്വവും സുഗമമായ സൗകര്യങ്ങളും ഉറപ്പാക്കണം. എരുമേലി വലിയതോട്ടിൽ മാലിന്യങ്ങൾ തള്ളുന്നത് തടയണം. പമ്പയിൽ 50 മീറ്റർ ഇടവിട്ട് ബിന്നുകളും സിസിടിവി ക്യാമറകളും സ്പീക്കറുകളും സ്ഥാപിക്കണമെന്ന മുൻ ഉത്തരവ് കർശനമായി നടപ്പാക്കണമെന്നും കോടതി വ്യക്തമാക്കി.
High Court issues strict directives to prevent Pamba river pollution
