തോട്ടപ്പുഴശേരിയിൽ അഗ്നിബാധയെ തുടർന്ന് വീട് പൂർണമായി കത്തിനശിച്ചു
കോഴഞ്ചേരി : തോട്ടപ്പുഴശേരിയിൽ അഗ്നിബാധയെ തുടർന്ന് വീട് പൂർണമായി കത്തിനശിച്ചു. തിങ്കളാഴ്ച വൈകീട്ട് 3.30 ഓടെ കുറിയന്നൂർ വലിയകാലാ ജങ്ഷന് സമീപമാണ് സംഭവം.
മരത്തോൺ എം.വി. തോമസ്, ഭാര്യ സൂസമ്മ തോമസ് എന്നിവരാണ് ഈ വീട്ടിൽ താമസിച്ചിരുന്നത്. സൂസമ്മ കുറിയന്നൂർ മാർത്തോമ്മാ പള്ളിയിലെ സേവികാ സംഘത്തിലെ പരിപാടിയിൽ പങ്കെടുക്കാൻ പോയിരിക്കുകയായിരുന്നു. ഈ സമയം വീടിന് പുറത്തായിരുന്ന ഗൃഹനാഥൻ വീടിനുള്ളിൽനിന്ന് പുക ഉയരുന്നത് കണ്ട് കോയിപ്രം പോലീസിനെ വിവരമറിയിച്ചു.
പോലീസ് അറിയിച്ചതിനെ തുടർന്ന് തിരുവല്ലയിൽനിന്നും രണ്ട് യൂണിറ്റ് അഗ്നിരക്ഷാസേന എത്തി തീ അണയ്ക്കാൻ ശ്രമിച്ചങ്കിലും 150 വർഷത്തിലേറെ പഴക്കമുളള അറയും നിരയുമുളള വീടിന്റെ ഭാഗത്തേക്ക് തീ ശക്തമായി പടരുകയായിരുന്നു. രണ്ട് മണിക്കൂറോളം ശ്രമപ്പെട്ടാണ് തീ അണയ്ക്കാൻ സാധിച്ചത്. വീട്ടുപകരണങ്ങളും ഇരുവരുടേയും സർക്കാർ, ബാങ്ക് രേഖകളും അഗ്നിക്കിരയായി. അഗ്നിരക്ഷാസേനാ തിരുവല്ല യൂണിറ്റിലെ ഉദ്യോഗസ്ഥരായ കെ.എസ്. അജിത്ത്, ശശികുമാർ, ആർ.എസ്. ബിജു, ജോട്ടി പി.ജോസഫ്, ആകാശ് തോമസ്, സണ്ണി, മുകേഷ് എന്നിവർ രക്ഷാപ്രവർത്തനത്തിന് നേതൃത്വം നൽകി.
fire force
